Təcrübəli mütəxəssis, həkim-oftalmoloq Cavid Namiz oğlu Allahverdiyev ali tibb təhsilini 2001–2007-ci illərdə Azərbaycan Tibb Universitetində həkim-terapevt ixtisası üzrə almışdır.

Ali təhsildən sonra İsmayıllı Rayon Mərkəzi Xəstəxanasında interna keçərək peşəkar fəaliyyətinə addım atmışdır. Dr. Cavid Allahverdiyev 2011–2014-cü illərdə Akademik Zərifə Əliyeva adına Milli Oftalmologiya Mərkəzində rezidentura təhsili alaraq oftalmologiya sahəsi üzrə ixtisaslaşmışdır. Cərrahi bacarıqlarını artırmaq məqsədilə Rusiya Federasiyasının Ufa Elmi Tədqiqat Göz Xəstəlikləri İnstitutunda katarakta cərrahiyyəsi (fakoemulsifikasiya) və göz travmaları üzrə müxtəlif illərdə təlim proqramlarını uğurla tamamlamışdır.

O, həmçinin Tehran Tibb Elmləri Universitetinin Farabi Göz Xəstəxanasında buynuz qişa və göz səthinin xəstəlikləri alt ixtisası üzrə dar ixtisaslaşma (“fellowship”) proqramında iştirak etmişdir. Karyerası ərzində respublikamızın müxtəlif bölgələrində, o cümlədən Quba Müalicə Diaqnostika Mərkəzində və Lənkəran şəhərində yerləşən “Avicenna Medical Center”də həkim-oftalmoloq kimi çalışmışdır.